Ajit Pawar on Parth Pawar Land Case: राज्याचे उपमुख्यमंत्री अजित पवार (Ajit Pawar) यांचे सुपुत्र पार्थ पवार (Parth Pawar) यांच्या अमीडीया हेल्डिंग्स एलएलपी कंपनीने पुण्यातील कोरेगाव पार्कमधील तब्बल 1804 कोटी रुपये बाजारभाव असलेली जमीन फक्त 300 कोटी रुपयांमध्ये खरेदी केल्याने एकच खळबळ उडाली आहे.
या प्रकरणात आता राजकारण देखील तापायला सुरुवात झाली आहे. विरोधक चारही बाजूने अजित पवारांवर जोरदार हल्लाबोल करत आहे. तर दुसरीकडे राज्याचे मुख्यमंत्री देवेंद्र फडणवीस यांनी देखील या प्रकरणात सखोल चौकशी करण्यासाठी एका समिती गठित केली आहे.
तर आता या प्रकरणात उपमुख्यमंत्री अजित पवार यांची पहिली प्रतिक्रिया समोर आली आहे. असलं काहीही चुकीचं केलेलं मला चालणार नाही, त्या व्यवहाराशी माझा काहीही संबंध नाही अशी प्रतिक्रिया उपमुख्यमंत्री अजित पवार यांनी दिली आहे.
माध्यमांशी बोलताना अजित पवार म्हणाले की, माझा त्या व्यवहाराशी दुरान्वये संबंध नाही. मी कुणालाही फोन केला नाही. चुकीच्या कामाला माझा कसलाही समर्थन नाही असं माध्यमांशी बोलताना उपमुख्यमंत्री अजित पवार म्हणाले. तसेच या प्रकरणात मुख्यमंत्री देवेंद्र फडणवीस यांनी सखोल चौकशी करावी अशी मागणी देखील अजित पवार यांनी माध्यमांशी बोलताना केली.
माध्यमांशी पुढे बोलताना अजित पवार म्हणाले की, मला याबाबत काहीही माहिती नाही. सध्या न्यूज चैनलमध्ये जे काही चाललं आहे आणि जे प्रश्न उपस्थित करण्यात येत आहे. मी त्याबद्दल माहिती घेईन कारण मागे 3-4 महिन्यांपूर्वी अशा काही गोष्टी कानावर आले होते. त्यावेळेस देखील मी असलं काही चुकीचं केलेलं मला चालणार नाही. असल्या चुकीच्या गोष्टी कुणीही करु नका असं मी म्हटलं होतं. असेही यावेळी अजित पवार म्हणाले.
नेमकं प्रकरण काय?
उपमुख्यमंत्री अजित पवार यांचे सुपुत्र पार्थ पवार यांची कंपनी अमीडीया हेल्डिंग्स एलएलपी कंपनीने पुण्यातील कोरेगाव पार्कमधील 1804 कोटी रुपये बाजारभाव असलेली जमीन फक्त 300 कोटी रुपयांमध्ये खरेदी केली आणि या जमीन खरेदी व्यवहारावर लागणारी 21 कोटी स्टॅम्प ड्युटी राज्य सरकारने माफ केल्याने या प्रकरणात चौकशी करण्यात यावी अशी मागणी विरोधकांकडून होत आहे. तसेच पार्थ पवार यांनी चुकीच्या मार्गाने जमीन व्यवहार केल्याने त्यांच्यावर कारवाई करण्यात यावी अशीही मागणी विरोधकांकडून करण्यात येत आहे.
चौकशी होणार ; मुख्यमंत्री देवेंद्र फडणवीस
तर दुसरीकडे या प्रकरणात माध्यमांशी बोलताना मुख्यमंत्री देवेंद्र फडणवीस म्हणाले की, मी या प्रकरणात सर्व माहिती मागवली आहे. या प्रकरणात प्राथमिक चौकशी करून मला जे सांगायचे आहे ते मी तुम्हाला सांगणार अशी प्रतिक्रिया मुख्यमंत्री देवेंद्र फडणवीस यांनी माध्यमांशी बोलताना दिली.