Rupali Patil Thombre : उपमुख्यमंत्री अजित पवार यांच्या नेतृत्त्वाखालील राष्ट्रवादी काँग्रेस (अजित पवार गट) मध्ये महिला नेत्यांमधील वाद चांगलाच चिघळला आहे. महिला प्रदेशाध्यक्ष व राज्य महिला आयोगाच्या अध्यक्षा रूपाली चाकणकर (Rupali Chakankar) आणि पक्षाच्या प्रवक्त्या रूपाली पाटील ठोंबरे (Rupali Patil Thombre) यांच्या वादावर अखेर पक्षाने दखल घेतली असून, ठोंबरे यांना कारणे दाखवा नोटीस बजावण्यात आली आहे.
फलटण येथील महिला डॉक्टर आत्महत्या प्रकरणानंतर रूपाली ठोंबरे यांनी रूपाली चाकणकर यांच्यावर गंभीर आरोप करत आंदोलनही केले होते. चाकणकर यांनी संबंधित तरुणीचे चारित्र्यहनन केल्याचा ठोंबरे यांचा आरोप होता. या प्रकरणामुळे दोघींमध्ये तीव्र शाब्दिक संघर्ष रंगला होता.
यानंतर, पक्षाचे संघटक सरचिटणीस संजय खोडके यांनी रूपाली ठोंबरे यांना नोटीस पाठवली असून, त्यांच्या वक्तव्यामुळे पक्षशिस्त भंग झाल्याचे नमूद केले आहे.
“आपण पक्षाच्या प्रदेश प्रवक्त्या पदावर असताना, राज्य महिला आयोगाच्या अध्यक्षा व महिला प्रदेशाध्यक्ष यांच्याबद्दल माध्यमांमध्ये केलेले वक्तव्य हे पक्षशिस्तीच्या विरोधात आहे. त्यामुळे आपल्या विरोधात शिस्तभंगाची कारवाई का करू नये, याबाबत सात दिवसांत लेखी स्पष्टीकरण द्यावे,” असे नोटिशीत स्पष्ट करण्यात आले आहे.
ही नोटीस उपमुख्यमंत्री अजित पवार, प्रदेशाध्यक्ष सुनील तटकरे आणि राष्ट्रीय कार्याध्यक्ष प्रफुल्ल पटेल यांनाही पाठवण्यात आली आहे.
दरम्यान, यावर ठोंबरे यांची फेसबुकवर प्रतिक्रिया आली असून त्यांनी नोटीस फोटो टाकत म्हणाल्या की, आज रात्री पक्षाकडून जगातील महिलांना न्याय देणाऱ्या महिला आयोगाच्या अध्यक्षाविषयी केलेल्या वक्तव्याविषयी खुलासा मागण्यात आलेला आहे.
खरं तर खुलासा देण्याची वेळ 7 दिवस अत्यंत कमी वेळ देण्यात आली आहे. मी वैयक्तिक हितसंबध ते हगवणे प्रकरण ते आमच्या भगिनी कैलासवाशी डॉक्टर संपदा मुंडेंच्या चारित्र्यहनन प्रकरणापर्यंतचा सविस्तर खुलासा देण्यात येईल.
ज्यांनी मयत भगिनीचे चारित्र्यहनन केले त्याच्या विषयी खरतर काय खुलासा द्यावा?, अस ठोंबरे म्हणाल्या आहेत.