Nowgam Police Station : जम्मू आणि काश्मीरमधील श्रीनगरमधील नौगाम पोलीस ठाण्यात झालेल्या भीषण स्फोटात नऊ जणांचा मृत्यू झाला आहे तर अनेक जण जखमी झाले असल्याची माहिती समोर आली आहे. माहितीनुसार शुक्रवारी रात्री पोलिस आणि फॉरेन्सिक सायन्स लॅबोरेटरी (FSL) पथके परिसरात तपास करत असताना ही घटना घडली.
स्फोटकांच्या तपासादरम्यान अपघात
हरियाणातील फरिदाबाद येथून जप्त केलेल्या मोठ्या प्रमाणात स्फोटकांचे नमुने घेत असताना हा स्फोट झाला. ‘व्हाइट-कॉलर’ दहशतवादी मॉड्यूलच्या तपासादरम्यान अलीकडेच जप्त करण्यात आलेली हीच सामग्री होती. तथापि, स्फोटाचे कारण अद्याप अधिकृतपणे पुष्टी झालेले नाही.
परिसराचे मोठे नुकसान, रस्ते बंद
स्फोटाची तीव्रता इतकी मोठी होती की पोलीस ठाण्यात उभ्या असलेल्या अनेक वाहनांचे नुकसान झाले. घटनेनंतर लगेचच अनेक अग्निशमन दलाच्या गाड्या घटनास्थळी दाखल झाल्या. सुरक्षेच्या कारणास्तव पोलिस ठाण्याकडे जाणारे सर्व रस्ते तात्पुरते बंद करण्यात आले.
2900 किलो अमोनियम नायट्रेट जप्त
काही दिवसांपूर्वीच, सुरक्षा यंत्रणांनी फरिदाबादच्या धौज आणि फतेहपूर तैगा भागातील दोन भाड्याच्या खोल्यांमधून अंदाजे 2900 किलो अमोनियम नायट्रेट आणि इतर स्फोटक पदार्थ जप्त केले. या खोल्या अल-फला मेडिकल कॉलेजमध्ये शिकवणारे पुलवामाचे रहिवासी डॉ. मुअज्जमिल शकील यांच्या नावाने भाड्याने घेतल्या होत्या.